西九戲棚出年搞足3周 今年反應熱烈 逾萬人入場

2012/3/16 明報

【明報專訊】今年春節嘅西九大戲棚反應好好，雖然只有一個禮拜，但都有1.2萬人入場，西九管理局個心雄起上嚟，明年春節會再搭棚，要搞足3個禮拜。西九表演藝術行政總監茹國烈笑言，今年門票超筍價10元，當送禮畀市民。但就有業界人士覺得西九頂爛市，所以明年嘅大戲棚，大老倌嘅節目要加價，貼近市價。

茹國烈話，明年諗住除咗粵曲，仲玩埋京劇、崑曲、南音、中樂等，出面仲搞埋小攤檔，營造市集氣氛，事關今年得維他奶同花生，有觀眾問點解冇蔗同烤魷魚賣，睇嚟觀眾想有多啲嘢食。

除咗搞節目，西九管理局亦要研究未來場地點樣管理，其中就係同藝發局合作搞咗個「本地藝團領袖人才海外考察及培訓計劃」，資助大中小藝團嘅領導層去外國考察，然後將考察經驗同建議寫成報告畀西九管理局，初步名額係4至6人，今日起接受報名。

Emily問到資助包唔包括搭私人飛機？茹國烈話，一定唔畀申請人坐頭等。咁樣，若嗰個申請人只係遊埠去玩，會否被要求回水？茹國烈就話西九管理局一定會密切監察申請人提出嘅計劃。