張文瞓身爭位影素姬 緬甸觀戰 行袈裟革命路

張文光的緬甸民主路線:

節錄自2012/4/9 明報
昂山素姬係緬甸人嘅精神領袖，難得到訪嘅張文當然想一睹佢風采。佢首先去昂山素姬嘅選區感受選舉氣氛，再喺補選前一日去昂山素姬被軟禁20年嘅大屋外參觀。

張文此行亦有參觀紀念昂山素姬父親昂山將軍嘅博物館，同埋沿「袈裟革命」嘅路線行咗一次。


2012/4/9 明報

【明報專訊】緬甸啱啱舉行國會補選，反對派領袖昂山素姬勝出，歷史性晉身國會。向來鍾意周遊列國嘅民主黨立法會議員張文光，早前去咗當地觀戰，更同一眾海外傳媒喺昂山素姬嘅大宅外搶位守候，親自拍低呢位民主女神嘅側面。

昂山素姬係緬甸人嘅精神領袖，難得到訪嘅張文當然想一睹佢風采。佢首先去昂山素姬嘅選區感受選舉氣氛，再喺補選前一日去昂山素姬被軟禁20年嘅大屋外參觀。張文話，當時大屋外有好多海外傳媒守候，昂山素姬嘅車隊一出現，佢仲同一大班記者搶位，成功影到女神，「雖然只拍到身影，但見到佢寧靜嘅微笑，已經好開心」。

睇到呢度，讀者係咪好想睇吓呢幅素姬側面相呢？可惜吖，我哋嘅攝影主管睇過張文嘅大作，話張相真係好朦好暗，恐怕見咗報都睇唔清呀，所以Emily唯有向讀者同張文講聲sorry啦。

張文此行亦有參觀紀念昂山素姬父親昂山將軍嘅博物館，同埋沿「袈裟革命」嘅路線行咗一次。佢同Emily講，自己身為民主派人士，多次去過緬甸駐港總領事館抗議，今次能夠入境，反映緬甸已經陸續開放，又話睇到被外界視為封閉國家嘅緬甸，都可以一人一票選出領袖，再睇番香港嘅小圈子選舉，就更加感慨。