細路仔爬包山架

2012/4/23 明報

【明報專訊】太平清醮搶包山比賽今個禮拜六（28日）深夜舉行，入得決賽嘅都經過篩選，體力差啲都無得玩，細路仔就更難入選。不過一班細路仔都有機會獻技，噚日就率先喺長洲「爬包山」熱身，咪睇佢哋細細粒，爬起上嚟都幾快㗎。

其實，細路仔爬包山呢一幕，只係噚日長洲搞嘅「包山嘉年華2012」之「攀爬嘉年華」活動，目的係畀市民感受吓爬包山嘅樂趣，但真包山就無得爬，淨係畀個包山架你爬。大會仲加開小朋友組別，一班細路扣上安全帶後，三扒兩撥就爬上個架頂，幾好身手。

噚日嘅嘉年華仲有好多精彩表演，包括中國香港攀山及攀登總會成員示範攀包山技術同安全措施，市民都盡興而歸。

（政府新聞處）