港大學生會百歲 許廷鏗羽翹做大使

2012/4/16 明報

【明報專訊】香港大學慶祝百周年校慶嘅活動一浪接一浪，今次輪到港大學生會喺7月舉辦聯合大學運動邀請賽，邀請11間本地及內地、日本、新加坡同馬來西亞嘅大學生齊集港大一較高下，慶祝港大同學生會100歲生日。佢哋更特登搵埋仲喺港大讀緊書嘅歌星許廷鏗，同埋港大校友羽翹做活動大使，希望吸引大家關注今次活動喎。

唔好以為港大同學係亂咁搵佢兩個幫手，好似許廷鏗咁，佢除咗係牙醫學士五年級生，仲係港大足球精英運動員，做今次運動會嘅活動大使可謂啱晒，而羽翹則係港大物理系畢業生。
除咗佢兩個外，港大學生會今次仲搵咗3個活動大使，分別係港大商科一年級生嘅港隊乒乓球隊成員李冠毅、港大商科二年級生兼香港女子標槍紀錄保持者胡泳彤，以及前劍擊隊成員、家喺港大做研究嘅黃金球。