六四長跑 城大跑到中聯辦

2012/4/6 明報

【明報專訊】支聯會4月15日舉行「毋忘六四」長跑，由於今年係23周年，所以要跑23公里。今次長跑由城巿大學起跑，經理大再跑至星光大道，之後搭船過海跑去中聯辦。Emily問支聯會主席李卓人，今次由候任特首梁振英做過校董會主席嘅城大起跑，終點係支持梁振英選特首嘅中聯辦，有無特別含意？阿人就話，佢無諗到咁複雜，只係想試吓去唔同院校起跑而已，舊年則喺中大起跑。

阿人話，每年嘅六四紀念活動，都希望盡量畀多啲內地「自由行」遊客見到，所以揀咗好多自由行旅客出入嘅星光大道跑。將於4月28日開幕嘅六四臨時紀念館，亦係支聯會今年重點項目之一，阿人家正物色上水街板位，希望可以向內地自由行旅客宣傳紀念館。

途經星光大道 向自由行宣傳

除咗自由行，支聯會安排咗7間中學嘅學生，5月4日開始到紀念館參觀，亦會去18間學校表演六四舞台劇。支聯會要傳承平反六四，都要多啲1989年時仲未出世嘅後生仔支持。