展覽: 六四紀念館暫駐汝州街

相片來源: 明報

2012/3/8 明報

【明報專訊】支聯會話要開「六四紀念館」都講咗好多年，今年終於開得成。主席李卓人噚日公布，會開一個臨時「六四紀念館」，但就話當年學生逃難，帶走嘅文物唔多，呼籲各方捐出同六四有關嘅文物，等佢哋展覽可以更豐富！

籲各界捐出六四文物

近千呎嘅展館，暫時藏有當年學生喺北京街頭執返嚟嘅彈頭，同埋當年北大學生簽名嘅T恤等，都係熱心人士捐出。支聯會就展出1989年多份剪報，仲設計咗一個互動多媒體學習區，等大家更了解六四事件。人哥希望可以透過今次計劃測試各界反應，如果反應好，會計劃籌款買一個2000呎地方，設一個永久嘅六四紀念館。

呢個臨時嘅六四紀念館設喺深水埗汝州街269號2樓，即港鐵C2出口附近，由4月29日開放到6月10日，周一至周五開朝10晚6，周六、日同公眾假期就朝12晚8。人哥鼓勵通識老師可以同佢哋聯絡，安排專人導賞。