【明報專訊】香港唔少離島好似長洲、蒲台島、東龍洲等等，都有好多珍貴石刻同碑文，唔少更相傳喺14世紀甚至青銅時代已經存在，不過佢哋都喺山崖邊，加上保養差，遊客好少可以觀賞得到。古蹟辦呢排搵咗香港大學建築學院，特別就保養同遊人觀賞石刻嘅方法做研究，提出咗好多設計方便同新穎嘅「秘道」，等大家可深入石刻所在地，報告噚日交咗畀古蹟辦。
報告話，為咗石刻可以同周圍環境共融，唔會搵個鐵箱封實佢哋，而會整多啲適當指示同介紹，等遊客參觀時了解吓文物歷史。研究團隊都計過，要修理好一個石刻，包括將周邊地方起行人路、介紹牌，為石刻提供基本保養等，要成87萬元。即係粗略估計，要整好9個離島地方，造價可能要800萬元，唔知星期四開會商議嘅一班古諮會委員會唔會覺得貴呢？
中銀搞地質生態導賞團
另外，Emily噚日聽聞，中國銀行由今個月底開始，至8月4號，每隔一個星期六，就會推出地質生態導賞團，參加者只需畀60蚊，就可以由專業導賞員帶領行東龍島、大嶼山西北、蒲台島、南丫島、米埔等生態價值高嘅地方，導賞團今日起接受網上報名，有興趣市民可登入http://www.bochk.com參與。
No comments:
Post a Comment