檔案工作者肩負使命 守護香港歷史

情迷歷史，尋得對味的歷史檔案，如獲至寶。在字裡行間中細味史實情節，如煲劇般過癮。歷史得以被發掘，多得一群守護歷史檔案之士。坊間有關歷史檔案管理的學會及課程寥寥可數，當社會意識到歷史的重要時，這門學問可吃香了：

HKU SPACE 行政人員課程（歷史檔案管理）：
http://hkuspace.hku.hk/cht/prog/exe-cert-archives-management

香港檔案學會：
http://www.archives.org.hk/tc/index.php

歷史檔案館：
http://www.grs.gov.hk/ws/tc/org_pro.htm


2014/1/13 am730


[AM人物]一頁頁發黃的檔案，盛載著歷史的重量。檔案工作毫不沉悶，從事檔案工作逾20年的蔡長貞及溫偉國，娓娓道出箇中樂趣，兩人歷年接觸的檔案五花八門，知道很多不足外人道的事件背景，更目睹不少尋根故事，從中為萬千檔案鑑定保留，但他們不是書寫歷史，而是有更大的使命感，一同守護香港歷史，竭力保存珍貴史料供後世流傳。
記者：鄭秀韻 攝影：林振東


香港現時只有3位認證檔案工作者，即考獲專業資歷認可，其中2人被立法會招攬。蔡長貞與溫偉國分別是立法會總檔案主任及檔案主任，兩人背景相似，都在政府檔案處工作逾20年，2011年轉投立法會，為立法會檔案館設館。
從事檔案工作看似容易，實際殊不簡單，檔案工作主要分為
鑑定、整理及永久保存，簡單而言，即先鑑定有關檔案是否具永久保留價值，然後整理檔案及附加註錄，並需相關設施及配套來永久保留。


鑑定檔案痛苦決定
檔案工作挑戰最高是做鑑定，蔡長貞說，「因為鑑定難免有主觀成分，真係要好小心話俾自己知，唔好因應自己要求……例如要了解自己嘅機構、了解檔案背後脈絡資料、其他地方有無呢啲檔案，係咪碩果僅存……」她形容鑑定過程牽涉很多痛苦的決定，「有時決定唔易，好多時係好痛苦做決定，因你如果唔要一批東西，可能永遠冇咗……」溫偉國補充，「即係冇得番轉頭，銷咗就銷咗……」
以臨時立法會為例，雖然只有短短一年的歷史，但立法會檔案館盡量保留臨立會所有資料，包括臨立會的開支申報，蔡長貞解釋，「通常accounting document做完晒audit後應該唔使留，但我哋保留，因為當時臨立會嘅資料好少，同埋喺深圳開會，我哋唔知如果chase番深圳發生咩事，搵啲咩資料先睇到，因為稀有，就算一鱗半爪都好，我哋都覺得有需要留。」
20年來每天埋首浩瀚如海的檔案資料，兩位檔案專家直言毫不沉悶，蔡長貞說，「比起一般office工作，我哋挑戰性好大，同埋做檔案工作，我哋都係守護緊香港歷史，或多或少有啲使命感，我哋保護緊社會上好重要嘅東西，盡我哋力量，希望將珍貴嘅嘢一代一代傳落去，而唔係只對住檔案。」她的拍檔溫偉國亦說，「自己覺得唔係寫歷史，係一個keeper，保留一啲嘢令將來嘅人可以寫歷史！」


「知道李小龍點死」
檔案工作還樂趣無窮，蔡長貞形容，「做檔案工作可以好好玩」，源於每人都會有好奇心，「我哋睇到好多唔做呢份工就睇唔到嘅嘢，例如我知道李小龍點死，我睇到佢死因研究報告，但我唔可以話俾你知……」還未及記者開口追問李小龍死亡之謎，她已先關上大門。她又舉另一個例子，「以前覺得殺人犯一定凶神惡煞，但睇好多殺人犯紀錄，好多人都好好樣，完全睇唔出會凶猛殺人，呢啲矯正自己stereotyping(成見)。」


為用者尋根感高興
不說不知，原來從事檔案工作亦可為人尋根，蔡長貞憶述多年前在政府檔案處工作的經歷，當時收到一名英國人來信，對方只知其祖父曾在香港牛奶公司工作，並提及薄扶林有地有牛，「佢好想知根源，我哋開始幫佢尋根，終於搵到好多資料……佢好開心，由一個自己好似冇晒後面，唔知發生咩事，突然覺得自己生命好豐富，因為認識咗阿爺經歷過咩，去到佢呢代……」她指久不久會遇到這些尋根故事，「我哋都覺得好heart warming，好有樂趣。」
香港至今仍未訂立檔案法，官方銷毀的政府檔案不計其數，她承認感到痛心，「任何檔案專業工作人員見到檔案銷毀都會痛心，我入行時有位師兄做鑑定，佢成日話每次做決定銷檔案瞓唔著覺，因為好似自己將某段歷史撕咗……」兩人均認同需要盡快立法，「每個國家(地區)都應有政策同法律框架嚟保護檔案」，幸而立法會有本身的檔案政策作後盾。
每個行業都有職業病，兩人被問及家裡是否保留很多檔案時均聞言大笑，溫偉國笑言「都會」，蔡長貞亦抱同一心態，「留咗先算啦，日後真係冇用先再諗，會有咁慣性。」她又說，「可能每人都鍾意儲嘢，係人性，例如可能會後悔點解『』咗小學成績表同作文，當時可能唔覺，但依家你想俾返下一代睇原來都冇咗，但好彩阿爺嗰份仲喺度，就如獲至寶……」


立法會館藏逾2萬檔案
立法會檔案館於兩年前正式開館，為立法會及公眾提供檔案服務，目前館藏包括文書、信扎、報告、手稿及其他文獻的原稿等，現時收藏逾2萬份檔案，約佔檔案館總容量七成，其中歷史最悠久為一份遠自1858年的立法局紀錄。另外，前立法局議員胡紅玉去信港督彭定康，要求設立人權委員會的書信往來、及5名立法會議員於2010年發動「五區公投」的辭職信等，亦藏於立法會檔案館。
由政府部門過檔立法會，蔡長貞滿有期盼，她指公營機構不計大學，只有立法會設有檔案館，「希望將自己經驗帶去立法會，如果立法會成立一個見得人嘅檔案館，都希望俾到一個好嘅example俾其他公營機構。」
另外，立法會本月起實施公開資料政策，非保密檔案可於20年後解封，保密檔案的最長封存期為50年，但公眾可申請查閱，公眾亦可預約參觀立法會檔案館。